Турк улсад ажиллах Монголын аврах багийн орчуулагчаар Д.Анхбаяр ажиллана
Чихэнд чимэгтэй
2023-02-08
Турк улсад аврах ажиллагаанд оролцох Монголын ОБЕГ-ын багийн орчуулагчаар МУИС-ийн Түүхийн тэнхимийн багш, доктор Д.Анхбаяр ажиллахаар өнөө өглөө мордлоо. Тэрбээр орчуулагчаас гадна орон нутгийн удирдлагатай холбоо тогтоох, хамтын ажиллагааны уялдааг хангах, тусламжийн барааг хэрэгцээт газар хуваарилах гэх мэт ажлыг зохицуулах үүрэгтэй ажиллах аж. Д.Анхбаяр 2008 оноос Анкарагийн их сургуульд Дундад зууны үеийн судалгааны чиглэлээр докторантаар суралцахын зэрэгцээ Анкара дахь Ираны соёлын төв, Иран улсын Тегераны их сургуульд перс хэлээр мэргэшсэн. Улмаар 2016 онд Анкарагийн их сургуульд “Ил хаант улсын везирийн тогтолцоо” сэдвээр түүхийн ухааны докторын зэрэг хамгаалжээ. Тэрбээр “Монголын Ил хаант улсын түүх, соёлтой холбоотой Турк дахь зарим газар, дурсгалт зүйлс”, “Ил хаадын замаар”, “Монгол, Туркийн харилцааны хөгжил” зэрэг олон ном бичсэн бөгөөд өнгөрсөн зун Туркийн зүүн нутгийн Ван мужид Монголын Ил хаан Хүлэгүгийн анхлан байгуулсан хотын туурийг олж илрүүлэх Монголын эрдэмтдийн багийн ахлагчаар ажилласан юм.
ТӨСТЭЙ МЭДЭЭ
Сэтгэгдэл (0)
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.